A finales del sieglu pasáu nel Estáu español, tolos mozos que cumplíen los dieciocho años, entá yeren llamaos a files pa cumplir el Seviciu Militar Obligatoriu de nueve meses. Munchos miles declaráronse oxetores de conciencia y cumplieron la Prestación Social Sustitutoria. Otros, miles tamién, ficiéronse insumisos ñegándose tanto a la mili como a la PSS.
N’Asturies, los insumisos pasaron del centenar, y de 1992 a 1997 diecinueve d’ellos pagaron pena de prisión nes cárceles d‘Uviéu y Villabona, condergaos na so mayoría a dos años, cuatro meses y un día.
La insumisión foi la mayor llucha antimilitarista y de desobediencia civil nos últimos cincuenta años.
Pa la xeneración que crecimos dientro del rexime del 78 esti movimientu foi una escuela de militancia política que mos marcó. Yera la primera vegada que la mocedá, mozos y moces , yera la protagonista d’una llucha política o social y non sofitu d’otres lluches obreres, sociales o polítiques nes que tamién se participaba.
Dientro d’Asturies foi la Cordinadora Asturiana pola Insumisión (CAI) el coleutivu que dinamizó la campaña escontra ‘l Serviciu Militar Obligatoriu y la Prestación Social Sustitutoria. Un casu únicu en tol Estáu al axuntar baxo unes mesmes sigles a tol movimientu antimilitarista asturianu. Dientro la CAI podía atopase xente militante de toles idioloxíes de la izquierda alternativo. Y non solo mozos, el papel y la implicación de munches moces foi tamién perimportante, como tamién lo foi’l grupu de madres y familiares.
La CAI consiguió en poco tiempu meter dientro de la axenda política y social asturiana non solo la campaña d’insumisión y escontra l’exercitu, plantegó tamién dir al raigañu del problema y denunció’l militarismu tresversal que s’atopa en toles estayes polítiques, sociales , económiques y humanes de la sociedá. El respaldu mediáticu y social nun fizo más que medrar dientro d’una actividá militante que nun paraba, con milenta aiciones que como la campaña de desobediencia civil nun renunciaben al enfrentamientu direutu escontra’l sistema y que fueron ante too de lo más orixinales.
Anque’l puntu difrencial d’esti movimientu foi’l compromisu de la so militancia. Compromisu que te podía llevar a la cárcele. L’encarcelamientu de Pin, el primer insumisu asturianu ecarceláu, foi un fechu traumáticu pal coleutivu. Dalgo esceicional que col pasu del tiempu y la entrada en prisión de munchos más compañeros llegó a asumise como dalgo normal.
Los presos dieron un fuercia enorme al movimientu, pero con ellos nun quedó otra que tresformar el discursu antimilitarista n’otru pola so llibertá. El desgaste de tener presos durante tantos años foi brutal, esa hiperactividá, esa presión de tener compañeros presos fizo morrer d’ésitu al coleutivu y a la campaña. Cola salida del últimu presu entamó tamién l’entamu del fin del movimiento antimilitarista n’asturies demientres munchos años
Tola xente que participamos na insumisión conocimos lo que foi la solidaridá, el compañerismu, la llucha real llevada al compromiso más altu. Foi una escuela de vida que mos marcó y que mos fizo insumisos y insumises pa siempres. Agora que los de siempres vuelven con vientos de guerra, xente nueva ta preparando la rempuesta al militarismu.
Y NON NUN HUBO PRISIÓN QUE PARASE LA INSUMISIÓN
Fer González