Ye significativo que les guerres periodifiquen la historia mundial: les  médiques,  les  púniques, les napoleóniques, la civil norteamericana, les dos mundiales, la fría, la de Vietnam, la d’Irak…

El mundiu vive una descomanada carrera armamentística, con saltos interañales de gastu militar alrodiu’l 7 por cientu y en toles rexones del mundiu dende 1990. Y tóo indica que la cosa va seguir igual nos años vinientes.

L’equilibriu llográu trabayosamente ente les dos potencies surdíes tres la Segunda Guerra Mundial saltara pelos aires y, amás, yá nun hai trataos de control d’armes, quedando en pie sólo un mui debilitáu Trataú de Non Proliferación Ñuclear.

Aparentemente, les causes d’esti incrementu del gastu bélicu son les dos guerres simultánies que tamos viviendo, la de Gaza y la d’Ucraña, pero eso ye una verdá a medies. El gran impulsu armamentísticu entamara en 2001, cuando Estaos Uníos invadiera Irak y más sero Afganistán. Nesi momentu ñaz un nuéu militarismu. De fechu, anque Estaos Uníos, China y Rusia encabecen la nómina de gastu militar, peraltos son los de dalgunos países d’África, Centroamérica y Caribe, mui alloñaos d’esos escenarios bélicos. En dellos casos trátase de una rempuesta violenta y militarizada al crimen organizáu d’unos estaos incapaces que contaxen a otros, por emulación delantre problemes iguales o por prevención ante gobiernos vecinos mui armaos.

Hai una base estructural dende 1918 que desplica la carrera armamentística. Entós surden los grandes mercaos financieros mundiales, cola competencia ente Llondres y Nuea York, y apaez la industria militar, non como un seutor pa la guerra, sinón como un subseutor de la industria en tiempu de paz. Entama asina la decisión de producir armes pal mercáu y non la vieya de producir armes porque hai guerra. Tres la segunda guerra y’l trunfu de los Estaos Uníos la política económica pasa a ser una guerra permanente, por mui fría que fuera, y la industria bélica un fautor principal nes tendencies a llargu plazu de la economía mundial.

La inestabilidá y la imprevisibilidá son dos carauretirístiques del presente y, nello pesa muncho la espiral armamentista: l’aumentu’l gastu militar d’un país faelu sospechosu a los sos vecinos, que respuenden elevando’l suyu, lo que lleva a una tensión que puede derivar nun conflictu.

La financiación del creciente militarismu representa, amás de desolación y destrozos ambientales, un decrementu d’otros rubros presupuestarios, lo que perxudica a los ciudadanos del mesmu país, anque ganara una hipotética guerra. Tamos delantre la famosa alternativa: cañones o mantega.

El mesmu Stiglitz escribiera sobro ello, afirmando que la crisis estaouniense vino motivada por el gastu bélicu d’Irak y Afganistán, que podría llegar a cincu biyones de dólares, como poco unos 17.000 dólares por familia.

Nesti sen el gastu bélicu fae que caiga la eficiencia del sistema económicu internacional. D’esta forma, les a tresformación del mundiu y una de les causes que despliquen la so decadencia. Nun deberíamos escaecer la historia: la economía asociada a la guerra fue la causa principal de la cayía de Roma.

David M. Rivas