El Atenéu Llibertariu d’Uviéu (ALDU) ta iguáu por un garrapiellu xente co la mira principal de esparder ente’l pueblu les realizaciones, les aspiraciones, los enfotos y les ideyes de lo que foi y ye el pensamientu llibertariu, la güeyá que fai la Anarquía del entornu social nel que va espoxigando.
Pa esti llabor organizámonos a la llana, en pie d’igualdá, co la Asamblea como la ferramienta de debate, puesta en común, toma de decisiones, como el preséu básicu de organización. Solventamos les necesidaes col apoyu solidariu ente nós y con quien llibremente acordamos, y tanto los recursos, la manera de averalos, y les actividaes que entamamos, xestionámoslo nós mesmamente. Quier decise que ye la Auto-xestión con base na Asamblea el mou de furrular que mos damos, porque esta ye la forma de organización social a la que aspiramos.
Encamentamos la nuestra pasión na construción duna cultura y un pensamientu social autónomu y antiautoritatariu a la escontra el Poder, al marxe dafechu de les istituciones, y col firme nel sofitu ente iguales, pa la recuperación y potenciación de la razón y la ación común, de un facer dende abaxu, col pueblu, n’andeches asamblearies, pal rescate del pensamientu llibre y el sentimientu comuneru del vivir.
Va pa cinco años, n’ochobre, que llevamos nesta xera, con una amplia y tamién intensa riestra d’actividaes estremaes que pasen por debates, esposiciones, charres, proyeciones de video y cine, representaciones de teatru, talleres… de les que esperamos facer una memoria pa espublizar na prósima edición desti periódicu.
Afalámoste a enfotate col ALDU na xera, participando nes nuestres Asamblees y actividaes.
Tamos n’Uviéu, C/. Ricardo Montes, 37-baxu – Ciudá Naranco, y puees saber de nós en ateneullibertariu.wordpress.com