El 18 de mayu viniente va tener llugar en Xixón una Xura de Bandera de 400 persones nos Xardinos del Náutico. L’actu ta entamáu pel Almirante Jefe del Arsenal de Ferrol (el exércitu español) a petición expresa de la alcaldesa Carmen Moriyón. Unos díes dempués, el 24 de Mayu, tendrá llugar un desfile militar naval y aéreu, como preludiu del Día de La Fuerzas Armadas, qu’esti añu tien llugar n’Uviéu el día 25 cola presencia de Felipe VI.
Estes ostentaciones militares nun son casualidá. Respuenden a un clima de preguerra instaláu en dellos países d’Europa por mor de la guerra d’Ucrania y de los movimientos xeopolíticos que tien asociaos. Nel Estáu español, el gobiernu más progresista de la Historia, al traviés de la ministra de defensa, Margarita Robles, tiróse de tiesta nel militarismu y el belicismu cola intervención de facto n’Ucrania, unviando armes y desplazando tropes a rexones averaes al conflictu, sirviendo d’esti xeitu a los intereses xeopolíticos de EEUU. Al empar d’esto, dende’l Gobiernu fáense declaraciones nes que s’alvierte a la población de la “amenaza total y absoluta” que supón Rusia y que “guei en día un misil balísticu puede aportar perfectamente de Rusia a España”. En definitiva, vienen a dicinos qu’hemos de tar preparaes pa la guerra.
Mentanto esto asocede n’Europa, en Palestina lleven más de 6 meses sufriendo un xenocidiu perpetráu pel Exércitu israelí. Nesti casu, el compromisu pa coles víctimes per parte de la OTAN, EEUU y la UE ye inesistente dafechu. En particular, el Gobiernu español, mientres en públicu amuesen la so condena y refugu de los asesinatos de civiles palestinos, nos despachos siguen siendo cómplices del xenocidiu vendiendo armes al Estáu d’Israel. Y al contrariu de lo que ficieron con Rusia, con Israel nun se frayaron les relaciones diplomátiques, nin hebo sanciones económiques y comerciales. Una vegada más demuéstrase que la política humanitaria y la diplomacia capitalista son fumu, maquillaxe, que nun sirven un res cuando los crímenes de guerra los comete un aliáu estratéxicu. Igual que pasó con Turquía y el Kurdistán, o con Marruecos y el Sáhara.
Y nesti contestu de guerra y xenocidiu, al Ayuntamientu de Xixón, gobernáu pola derechona más rancia, y al Estáu español, en manes de la izquierda más servil col capitalismu, paez-yos buena idea face-y un homenaxe a una institución como l’Exércitu. Y entamen desfiles militares y xures de bandera. La bandera y l’exércitu son símbolos de los valores más casposos de la sociedá: el nacionalismu español, el patriarcáu, l’odiu al diferente, la obediencia ciega, el supremacismu, el autoritarismu… Pero perriba de toes estes coses, simbolicen un sistema nel que los intereses de unos pocos impónense a la mayoría mediante la fuercia, la coerción y la represión.
Ye precisu qu’el Pueblu, la clase trabayadora, diga que yá valió y refugue alimentar a la bestia del militarismu. Nun queremos ser quienes paguemos les consecuencies de los conflictos d’intereses de los capitalistes. Como trabayadores que somos, como proletaries, siempres nos sentiremos más cerca d’un obreru palestín, rusu o chinu que d’un executivu norteamericanu, alemás o español. Comprendemos y sofitamos la resistencia de los pueblos al empar que condenamos la existencia de los exércitos al serviciu de los intereses capitalistes. Por ello, dende la CNT de Xixón facemos un llamáu a la movilización constante, a la desobediencia y a la acción directa escontra la guerra, escontra’l exércitu
y los valores que representa.
¡EXÉRCITU ESPAÑOL, FUERA DE XIXÓN!