El muérdagu ye una planta semiparásita de tarmos articulaos y siempres verdes. Tien flores masculines y femenines y da unes bayes, primero verdes y blanques al maurecer, que nun son comestibles y que maurecen a finales de la seronda. Crez preferentemente nes cañes de mazanales, perales y carbayos, no qu’a güeyu paez una madexa de tarmos en forma pelota.
Un pasáu máxicu
L’arfueyu yera sagráu pa los antiguos druíes, un bien pa tou mal, físicu o máxicu. Amás de les sos innegables virtúes pa combatir la arteriosclerosis, la tensión arterial y la epilepsia atribuyíase-y el poder de protexer y curar de forma máxica. Yera amás consideráu un símbolu de paz y un poderosu amuleto protector, amás del símbolu de la masculinidad, como contraposición al xardón, que yera’l símbolu de la femineidad. Según una antigua superstición, colgábase sobre los trubiecos de los neños, pa evitar que les faes robar y sustituyir por otros. Hai lleendes que dicen que los sos poderes máxicos provienen de que foi creáu como un elementu que nun yera del cielu nin de la tierra, yá que los sos raigaños nun toquen nunca la tierra, pero tampoco se sostien por sigo mesmu nel aire. D’ende el costume de recoyelo ensin dexar que caya al suelu, y de colgar del techu.
El besu debaxo del arfueyu
L’arfueyu utilizavase muncho nes festividaes acomuñaes a la fin del añu celta, escontra’l 1 de noviembre, y del solsticiu d’iviernu. Cola apaición del cristianismu, ente’l pueblu, siguió siendo consideráu un bon badagüeyu pa los sos posesores, siempres que se cortara cola debida reverencia, pero la so fuerte simboloxía pagana fixo que cayera en desusu, salvu no que se refier a la tradición romántica”. Yá na antigüedá, considerábase que besase debaxo d’un árbol con arfueyu facía durar l’amor o inclusive podía empecipialo. Ési ye’l significáu de el costume actual de besar a la pareya debaxo del arfueyu -colgáu de normal del dintel d’una puerta o del techu, a falta d’un carbayu-: suponse que fai perdurar l’amor.
El ritu de cortar l’arfueyu
De xacíu, l’arfueyu puede mercase yá cortáu formando parte de pequenos ramos con otres plantes siempres verdes, y casi siempres con bagues. Na antigüedá, el ritu de cortar l’arfueyu yera respetuosu y complexu. El meyor arfueyu pa cortar, el más pervalible, yera’l que crecía nos carbayos. La tradición dicía qu’había que pidir permisu a la planta antes de cortala, y que quien nun lo fixera cola debida reverencia sufriría tou tipu de males. Había que cortalo cuando la lluna tenía seis díes, d’un tayo, utilizando un foceya d’oru y evitando que cayera al suelu.