Ochobre’l 34, l’enseñu de la comuna Asturiana

Llega la seronda y entra Ochobre y, enverde amusgamos po los dís grises y la cayía de les fueyes, hailes, y hailos, que retoñamos con esi rixu que toma ñatura anantia de recoyese en sí mesma. Y pañamos, mayamos, collechamos, esfoyamos, folixamos, cantamos y celebramos. Y conmemoramos. Traemos a la memoria. Alcordamos.
Hailos, y hailes, que tamos nel enfotu que nesti mundiu al que vinimos a vivir como seres humanos, nin la vida ye digna de tal nome porque ye mera susistencia triste y miserable, nin la esistencia que llevamos corresponde a la de una especie racional, habiidosa, intelixente y con una concencia evolucioná que i tenía que permitir una relación solidaria ente los sos miembros y una convivencia armónica co les demás especies enun mediu ñatural bayurosu en recursos, diversu en ecosistemas, hermosu peronde lu mires y placenteru a refalfiar como ye el desti planeta. Y tamos nestes, en que llevamos una vida indigna y una esistencia desgraciá, porque una patulea de mangantes avariciosos valiéndose del poder y la autoridá tienen sometío a los sos intereses, po la fuerza de la ley y de les fuerces armaes, a les grandes mases de individuos desposeyíos y normalmente resinaos dende xeneraciones y xeneraciones…
Y hay quienes, arriendes, tamos encamentaos en tracamundiar esti orden de coses irracional, delirante, miserable, inxustu, opresivu, inhumanu, esti mundiu del dominiu del Estáu y la esplotación del Capital.
Quier decise que tamos na pelea, que mos paez ineludible a cualquier persona humana que nun tea dimpuesta a renunciar a la so dinidá, que tamos nel puxu porque les mases de individuos desposeyíos, los parias de la tierra, el proletariáu internacional tien que asumir la responsabilidá d’entamar el procesu revolucionariu –porque nun hai otra que la tresformación revolucionaria- que mos sitúe delantre una humanidá emáncipá de la tuleta de la autoridá y el Estáu y llibertá de la sumisión a la esplotación y el Capital.
Y tamos nestes entá, a estes altures de la experiencia humana y de la evolución de la cencia, la conocencia y la concencia de la especie, magar los movimientos revolucionarios de los últimos sieglos que enfrentaron el frenazu, la involución del progresu social del xéneru human, paralizáu o ralentizáu po la mor del porgüeyu, del interés del beneficiu priváu que acapara y acumula la riqueza social iguá pel trabayu del común.

Ente esos movimientos revolucionarios, ún de los más sinificativos aportó nestos dís d’Ochobre de 1934 pelos valles mineros y pelos pueblos y ciudaes. Entamáu y desendolcáu pol pueblu trabayaor, por un proletariáu astur munchu más bregáu y organizáu -fogueáu nes güelgues xenerales y revolucionaries frente a una Patronal caciquil y intrasixente- que’l de otres tierres del Estáu español, que tamién taben llamaes a una insurreción armada que namás que cuayó equí, dexando a los obreros asturianos enfrentaos solos ante tol aparatu represivu, miltar y policial del Estáu.
Los fechos, les aciones, la organización, el desarrollu, los enfrentamientos, les batalles, el desenllace y la represión ye cosa persabía y a disposición de quien quiera perfundizar n’ello. Aquí, daquella esperiencia que vieno a ser conocía como la Comuna Asturiana, destacamos delles enseñances que pol valir imperecederu, pol exemplu orixinal, pola aportación xenuina, queden como enseñu pal proletariáu. Mencionámosles ensin orden de prioridá o prevalencia porque toes tienen una importancia decisiva.
-La insurreción asturiana d’Ochobre de 1934 foi una esperiencia revolucionaria de clase, a la escontra de lo que caltien bona parte del historicismu burgués y socialdemócrata que lu presenta como una “intentona de golpe de Estado para derribar a un gobierno republicano”. El Pactu de Alianza Obrera (AO) en Asturies, suscritu el 31 de marzu de 1934 poles centrales sindicales UGT y CNT esplicita bien a les clares que “frente a la situación económico-política del régimen burgués en España se impone la acción mancomunada de todos los sectores obreros, con el exclusivo objeto de promover y llevar a cabo la revolución social … estableciendo un régimen de igualdad económica, política y social, fundado sobre principios socialistas y federalistas”. Nun cabe rocea denguna sobre la sinceridad de los socialistas y anarquistes asturianos nel su compromisu revolucionariu.
-Les confrontaciones cola patronal, amás de la concencia, van iguando un calter y unos valores que surden a la lluz nes dramátiques circustancies del fechu revolucionariu dándoi un puxu y una impronta que lu estrema y lu finca históricamente. L’entusiasmu xenerosu, la pasión na entrega, la tenacidá na porfía y el sacrificiu heroicu arrostraos na rebelión en Asturies pelos anarquistas, socialistas, comunistas, igual que por toos los demás ensin ascrición orgánica, denoten la esclariá concencia y lo fondero de la ardicia que alendaba al pueblu trabayaor en Asturies. L’enfotu comuneru, l’esfuerzu común, la concencia compartía de reconocese como iguales iguando una clas que los hermanaba penriba les particularidaes ideolóxiques, y a la fin la solidaridá interna que i da consistencia a un proyeutu, revélense nuna espontánea espresión sólida y rotunda: ¡UHP! Robra rellumante de la diñidá, autenticidá y altor de mires dun compromisu, que nun podía ser amenorgáu pola mezquindá dun birriu cambéu de gobiernu. Asina foi que un proletariáu forxáu nesti temple alcontróse cola capacidá enforma pa realizar la apuesta y la propuesta entamá po la Comuna Asturiana: la tresformación social revolucionaria pala supresión del vieyu Estáu y la esplotación Capitalista, y l’ensayu, l’intentu duna sociedá xusta, llibre y solidaria.
-Lo más allecionaor de la esperiencia revolucionaria d’Ochobre de 1934 ye xustamente lo más inaudito: cómo una xente esfavorecío, desposeyío, que echa la vida en trabayar de sol a sol, atropa la intelixencia y los arrestos pa asumir el retu que se i presenta n’aquelles circustancies históriques pa elevar a la humanidá a un estadiu superior de progresu y evolución. Y ye que l’advenimientu de la humanidá emancipá solo podía aportar de la man d’un proletariáu cosciente y conoceor de las capacidaes de la su clas.
Esti ye’l procesu pel que’l proletariáu, y namás el proletariáu, algama esa capacidá de tresformación revolucionaria.
El sufrimientu que experimenta un trabayaor particular, igual que lu soporten los sus compañeros de trabayu provoca qu’esa esperiencia compartía lu faiga parte común de una clas de persones: les desposeyíes y esplotaes, el proletariáu. La concencia de iguar una clas de persones iguales pola su condición, que son los condicionaos pola necesidá de ganase el sustentu, que tienen que poner en venta el su único bien que ye la su capacidá pal trabayu na creación de riqueza dótalos de solidaridá interna d’intereses y capacítalos pala creación de procesos d’organización de la produción y la distribución de los bienes. Esto definitivamente procúraios una conceción perfondera de la xosticia, ya que siendo esforzaos produtores de riqueza, vense sicasí expoliaos pola fuerza de los poderosos que la arramblen en beneficiu propiu, y acumúlenla como capital pa pagar fuerza de trabayu con que reproducir el procesu. Intelixencia de la inxosticia pues, de qu’esta contradicción ente riqueza social y acumulación privada sea el ostáculu pal progresu d’iquiá una nueva sociedá, igualitaria nel esfuerzu, xusta na distribución, y llibre del sometimientu pola fuerza. Capacidad organizativa, conciencia, compromisu y responsabilidá revolucionaria cimientos enriba los que descansa la insurrección de los trabayaores asturianos n’Ochobre del 34. Enseña que mos correspuende enarbolar a la xente proletario que güei decide, por concencia y diñidá, garrar el testigu que tanta sangre, cárcel, dolor y vilipendiu yos costó a los trabayaores asturianos fai agora 81 años, antiayer como quien diz. La Comuna Asturiana foi derrotá, pero nun fracasó. Queden les sos enseñes como muestra.

Xuandecaminos